Энергетика саласында еңбек ететін қыз-келіншектердің кездесуі өтті

2023 жылдың 25 мамыр күні «Маңғыстаумұнайгаз» АҚ-да аймақтың жетекші мұнай-газ және энергетикалық компанияларының нәзік жан өкілдерінің кездесуі өтті.

Кездесуге «Маңғыстаумұнайгаз» АҚ, «МАЭК» ЖШС, «МӨЭК» АҚ, «Маңғыстау Жарық» ЖШС, «ТеңізСервис» ЖШС, «Өзенмұнайгаз» АҚ, «Қаражанбасмұнай» АҚ сияқты компаниялардан 30-дан астам әйел жиналды.

Кездесу биылғы жылы өзінің 10 жылдық мерейтойын атап өтетін «KAZENERGY» Әйелдер энергетикалық клубының төрайымы болып табылатын «МАЭК» ЖШС бас директорының экономика және қаржы жөніндегі орынбасары - басқарма мүшесі Айзада Аққайсиева бастаған.

Кездесу барысында Айзада Үмбетқызы клубтың құрылу тарихы, оның тұжырымдамасы, өткізілетін форумдар, іс-шаралар және әйелдер көшбасшылары-клуб мүшелері туралы айтып берді.

Жылы достық атмосферада әйелдер бір-бірімен танысып, тұжырымдама және жоспарланған іс-шаралар туралы өз көзқарастарымен бөлісті, сондай-ақ барлық деңгейдегі және барлық қызмет салаларындағы әйелдерді қолдаудың маңыздылығын атап өтті.

Кездесу қорытындысы бойынша «Маңғыстаумұнайгаз» АҚ қаржы департаментінің директоры Шолпан Ильмуханбетова «ММГ» АҚ-да «KAZENERGY» әйелдер энергетикалық клубының қанатын құру туралы бастама көтерді.